ఇప్పటికి ఇంతే..

పదే పదే నువ్వలా అడుగుతూనే వుంటావు

ఈ ప్రమిద కింద నీడ దాటి రాలేవా అని

ఆ గాలికి ఎగిరిపోయిన గడ్డి కప్పు అటూ ఇటూ

చెదరి

మొన్నటి వానకు నానిన మట్టిగోడలుపై చారలుగా

మిగిలిన క్రీనీడలు

విరిగిన కంచెను ఆనుకొని ఎరుపు కాగితం పూల

మొక్క వంగిన కొమ్మలు

ఈ ఒంటరి ఆకాశం వీడిన వెన్నెల కాలుతున్న దేహపు కమురు

ఇదంతా ఎందుకు చెప్తున్నానో తెలియని ఓ 

అపస్మారకతలో చేజారిన కుంచె

ఇప్పటికి ఇంతే 

ఆ బాలుడు లేచి నీటిలోకి ఓ రాయిని విసిరాడు

రావి చెట్టు నీడ చెదిరింది 

పాయలుగా.....