Saturday, January 10, 2015

భారమితి

 
ఇప్పుడు నీకొక్కక్కటీ భారమౌతున్నాయి
ఒక్కొ క్షణమూ భారంగా కదలాడుతూ

నెర్రెలు బారిన అరచేతుల చాళ్ళ నిండా 
అంటిన మట్టి పెళ్ళలుగా

నీ గోళ్ళ చివురున ఆరిన రంగేదో 
తనను తాను కోల్పోయి 

ఒక్కో అక్షరానికీ అంటని తడితనం
ముక్కలైన వాక్యంగా 

మిగిలిపోనీ ఈ గది మూల 
ఓ పక్కగా సేదదీరుతున్న గాలిలా!!

Thursday, January 1, 2015

నేనిలా


ఏదో ఉత్సవ కోలాహలం
చుట్టూ హరివిల్లులా


ఇటువైపేదొ నలుపు తెలుపుల వర్ణ చిత్రం
ఆకాశమ్ నిండా కఫన్ లా


నువ్వొక్కడివే నిస్సహాయంగా 
దుఃఖపు చినుకులా


వడి వడిగా జారిపోతున్నట్టు కాలం 
పొడిబారిన మేఘంలా


తెగిపడిన చేతుల్నిండా యింత
దాహపు నాలుకలా


దేహమంతా చుట్టుకున్న నగ్న చర్మం
వలిచేస్తూ నువ్వలా

ఇంకొన్ని పూరేకులు దోసిలినిండా ఏరుకొని 
ఈ రాళ్ళ దారిలో పరుచుకుంటు నేనిలా!!
Related Posts Plugin for WordPress, Blogger...