Monday, November 10, 2014

చీకటి గోడకు...


ఖాళీ 
చేతుల్నిండా ఓ గాలి తిమ్మెరను ఒడిసి పట్టుకొని 
నేనింకా ఈ వంతెన చివర ఆగివున్నా


కన్రెప్పలపై 
ఓ మంచు బిందువు జారి ఉప్పగా 
పెదాలను తాకి నిన్నొకసారి గుర్తు చేస్తుంది


నువ్వంటావు 
నీవన్నీ ఒఠ్ఠి మాటలే కదా అని 
గాలికెగిరిపోయే ఎండుటాకునని


నిజమే
రోజూ మొలిచే విత్తులా 
ఆశగా ఎదురు చూపుల ఎండమావి చివర దాగివున్నా


కరిగిపోతున్న 
వెన్నెలనింత దోసిలిలో పట్టి ఈ నల్లని చీకటి గోడకు వేలాడదీసి 
చినిగిపోతున్న ఈ పేజీల మధ్య వేచివున్నా..

Saturday, November 8, 2014

ఇసుక వర్ణ చిత్రం..



ఈ కాలుతున్న వెన్నెల వేళ 

చిలకరించిన కాసింత చీకటి రేఖల మధ్య

దొంగిలించిన నవ్వునద్దుకొని 

గులక రాళ్ల పగుళ్ళ జాడలలో

ఓ అసంపూర్ణ ఇసుక వర్ణ చిత్రాన్ని అద్దుతూ

పగిలిన కలల అద్దంలో

గాయం ముఖాలుగా విడిపోతూ

నెత్తుటి దోసిలిలో

ఒలికిపోతూ!!

Tuesday, November 4, 2014

నిరామయం



నీకంటూ ఓ ఆకాశం వేలాడుతూనే వుంది


కానీ నేనింకా ఈ గరకు నేలపైనే కదలాడుతున్నా

నాదంటూ ఇక్కడ ఏమీ మిగలక 

ఎండిన రావి ఆకు ఈనెలపై ఒక్క మాట రాసి

ఈ నేల తడి మడతలో దాచి 

వీడిన పూరేకును అలంకరించి

ఈ రాతి పగుళ్ళ మధ్య

కళ్ళనిలా వేలాడదీసా!
Related Posts Plugin for WordPress, Blogger...