Friday, July 26, 2013

మృత పెదవులు


గదంతా పరచుకున్న చీకటి దీపపు కాంతిలో 
సన్నని నల్లని మెరుపు

కంటిపాప నలుపులో దాగిన
వెలుతురే కనిపిస్తోంది

అక్షరం చుట్టు పరచుకున్న వెలుగు 
వలయంలా

మాటల చుట్టూ అల్లుకున్న లోలోపలి
పరిమళంలా

చమురు ఇంకిన దీపపు ఒత్తి చివరి
మెరుపులా

గంధమేదో పూసినట్టు రాజుకుంటున్న
నిప్పు కణికలా

నువ్వలా దోసిలిలోకి రాగానే వేళ్ళ సందులగుండా
కరిగిపోతూ 

దాహార్తితో నెత్తురు చిమ్మిన గొంతులోంచి రాగమొకటి 
రాలిపడుతూ

వానలో తడిచిన కాగితప్పడవ మునకేస్తూ
చిరిగిపోతూ

మృత పెదవులపై కురిసిన చినుకు
తడి కోల్పోతూ

అసంపూర్ణంగా వదిలేసిన వర్ణ చిత్రంలా 
ఇలా వెలిసిపోతూ

Monday, July 15, 2013

మాటలు


కొన్ని మాటలు 
చెవిలో దూరినా మనసులో ఇంకవు

కొన్ని మాటలు
దూలం కంటే పెద్దగా అయి లోపలికి రాలేవు

కొన్ని మాటలు
ముళ్ళులా మారి దేహంతో పాటు మనసును గుచ్చుతాయి

కొన్ని మాటలు
ఆత్మీయంగా పలకరించి జీవం పోస్తాయి

కొన్ని మాటలు 
తొలకరి చినుకులా కురిసి చిగురు వేస్తాయి

కొన్ని మాటలు
వెన్నెల చల్లదనాన్ని పంచి ప్రశాంతతనిస్తాయి

కొన్ని మాటలు
రక్తాన్ని మరిగించి కరవాలాన్నందించి యుద్ధోన్ముఖున్ని చేస్తాయి

కొన్ని మాటలు
నిన్ను అంతర్ముఖున్ని చేసి సుషుప్తిలోకి నెట్టి స్వాంతననిస్తాయి

కొన్ని మాటలు
రావి ఆకు చివరన నీటి బొట్టులా నీ కనులపై పడి వెలుగు నింపుతాయి

కొన్ని మాటలు
అమ్మ చనుబాలులా మళ్ళీ మనిషిని చేస్తాయి...

Tuesday, July 9, 2013

ఆవలివైపు...



ఇలానే
ఇప్పటిలాగే
ఒక్కో క్షణం కోల్పోతూన్న
ప్రతి సారీ నన్ను వెంటాడే ప్రశ్న ఇదే

ఆవలివైపు మిగిలేదేముందని??
 
వేటాడే ప్రశ్న
వేట కొడవలిలా మెడవైపు దూసుకొస్తూ...

ఏదీ శాశ్వతం కాదన్న సత్యం
ఏదీ శాశ్వత సత్యం కాదన్న నిజం
ఏదీ నిత్యమూ కాదన్న నిష్ఠురం

ఈ వేధింపు మనసు సంధులలోనుండి
సుళ్ళు తిరుగుతూ అద్దం ముందు
నిరక్షర నిరుత్తరనౌతూ...

Thursday, July 4, 2013

భారమితి..

 
మనసులో ఒలికినది
చేతులలోకి చేరదు...

కనులలో తొణికినది
ఎదలో నిలవదు...

కాగితంపై చిందినది
నెత్తుటి జీర...

గొంతులో మూగైనది
తడి రాగం...

వేలి చివరే మిగిలినది
కుంచెకంటని రంగు...

భారమితికి అందనిది
భావ ప్రకంపన...

Related Posts Plugin for WordPress, Blogger...