వాన వెలసిన వేళ ఒక చీకటి గోడపై
గోటితో చెక్కుతూ
కాగితప్పడవనొకదాన్ని గుప్పిట
జారవిడుస్తున్న సమయంలో
రెక్క తెగి రాలిన భోగన్ విల్లియా
పూరేకొకటి కొట్టుకు పోతున్నప్పుడు
నువ్వంటావు
అలా ఓ కొబ్బరాకులా అల్లుకోనీ అని
ఏముందక్కడ వడలిపోయి అలసిన
ఓ రాతిపొర తప్ప
భ్రమ కాదా ఇది
ఒక మాయజలతారు ముసుగు వేసుకున్న
తడి ఇగిరిన తాటాకు పందిరి కదా
నీడలేవో ముసురుకుంటూ
చివరి శ్వాస తీసుకుంటు ప్రమిదనొదిలిన
దీపం ముందు విరిగిన వెలుగు రేఖలా!!
