ఈ రాత్రి..

ఇప్పుడు మొదలయ్యింది..

ఇప్పుడు 

అంతా నువ్వే అంటూ 

నువ్వూ మేమే అంటూ 

వీధుల్లోకి నడిచి వస్తున్నారు

ఒక చావు ఇన్ని గొంతులుగా 

నినదించడం కొత్త ఆశ కదా!

చంపిన వాడు 

ఏ కలుగులోనో దాక్కొని 

తన చేతికంటిన నెత్తురుని

వదుల్చుకో చూస్తున్నాడు!

కదులుతున్న పాదాల ధ్వని

వాడి గుండెల్లో దడపుట్టిస్తుంది

నీ నెత్తుటి వాసన మట్టిలో కలిసి

నల్లని అక్షరాలుగా మారి 

దుఃఖాన్ని ఎరుపెక్కిస్తున్నాయి!

నువ్ ‌నవ్వుతున్న ఫోటో 

ఈ దేశ చిత్రపటం అవుతోంది!

ఒక్కొక్కరూ నేనే నువ్వంటూ 

సవాల్ విసురుతున్నారు!

యుధ్ధం 

ఇప్పుడు మొదలయ్యింది!!

(గౌరీ లంకేష్ హత్యకు నిరసనగా)

#GauriLankesh

Septmebr 8/2017

నన్ను క్షమించు

కలల నావిక

నెలవంక చిగురున

బొట్లు బొట్లుగా

నెత్తుటి చినుకులు

రాలుతూ

తనను తాను

పేల్చుకున్న గుండె

విస్ఫోటనం గరకుగా

తెగుతూ

నువ్వొక రెక్క 

తెగిన పావురాయివే 

తనొక కలల

నావిక కదా?

కొన్ని క్షణాలు

గొంతు తెగి

అమాయకంగా

దోసిలిలో ఎర్రమల్లెలతో

(తరిషి స్మృతిలో)

సూరీడు ముఖాన నెత్తురి మరక..

ఈ తెల్లవారే సూరీడు

ముఖాన మీ నెత్తురి మరక...

గాయపడ్డ అడవి
గర్భశోకంతో నెత్తురు మడుగైంది...

ఒక్కొక్కరు ఒకే కలను కంటూ
ఒరిగి పోతూ పిడికిలెత్తుతూ...

చుట్టూరా కమ్ముకున్న వేట గాళ్ళ
మధ్య పోరాడుతూ మందుగుండవుతూ...

వారి కలలను చిదిమేయాలని
గుండెలపైనే కాదు మెదళ్ళనూ చీలుస్తూ గుళ్ళ వర్షం...

నవ్వుతూ వాడి ఓటమిని
చూస్తూ ఎరుపెక్కిన తూరుపు తీరం...

ఆశయాలను అంతం చేయాలన్న
వాడి కలను చిద్రం చేస్తూ తూటా దెబ్బతిన్న లేగ దూడ రంకెవేస్తూ....

దేహమంతా కప్పుకున్న నెత్తుటి వస్త్రాన్ని
జెండాగా ఎగురవేస్తూ అడవి తల్లి దిక్కులు పిక్కటిల్లెలా నినదిస్తూ...

(1998 ఆగస్టు 9 న ఒరిస్సా రాష్ట్రంలోని కోపర్ డంగ్ అటవీ ప్రాంతంలో జరిగిన ఎదురుకాల్పులలో్ అమరులైన 13 మంది ప్రజావీరుల స్మృతిలో. తొలిసారిగా రాజ్యం హెలికాప్టర్ నుండి కాల్పులు జరిపిన దారుణ సంఘటన.)