మోదుగుపూలు

నేలరాలిన
మోదుగుపూలు
వీరుని
అమరత్వం..

అతడు

అతడి నవ్వు
ఆకాశంలో సంతకం చేయబడ్డది....

అతడి దుఃఖం
సాగరంలో నిక్షిప్తమైంది....

అతడి ప్రేమ
నేలంతా పచ్చదనం పరిచింది....

అతడి స్నేహం
గాలిలో పరిమళమై వ్యాప్తి చెందింది....

అతడి కోపం
అగ్నిపర్వతంలా రగులుతూనే వుంది....

అతడి వాత్సల్యం
వసంతగానమై వినిపిస్తూనే వుంది....

మన్నెం సూరీడు

నువ్వెక్కుపెట్టిన విల్లు
సంధించిన మిరప టపాకాయ్
వాడికి ఊపిరాడనివ్వలేదు...

మన్యం పజల పోరాట శక్తిని
ప్రపంచానికి చాటి చెప్పి
మడమ తిప్పని,
వెన్ను చూపని ధీరత్వం నీవని
నీ సేన ముందు వాడి మరఫిరంగులు
తుస్సుమన్నాయన్న మాట
మాకెప్పటికీ ఉత్తేజాన్నిచ్చే పోరుపాట...

శత్రువు గుండెల్లో నిదురించిన నీ రూపం
మాకు ఆరాధ్యం...

నేటికీ మన్యాన్ని దోచుకునే నల్లదొరల పాలిట
నీ స్ఫూర్తి ఓ మందుపాతర...

నీ వారసత్వం అందుకున్న యువత
ఈ దేశ భవిత....

ప్రతి ఉదయంలో తూరుపున
నీ రూపం ఉదయిస్తూనే వుంది...
(మన్నెం విప్లవ వీరుడు అల్లూరి 87వ వర్థంతి)