లేలేతగా...

హృదయంపై బాసింపట్టు వేసిన
జ్నాపకాలు...

దేహమంతా ఇప్పపూల వాసనేస్తూ
మత్తుగా...

దాహం తీర్చని జీలుగు కల్లులా
గొంతు దిగుతూ...

చిగురు మామిడి లేలేత ఆకులా
చేతి కంటుతూ...

ఈ రాతి బాటలో అరి పాదం
మండుతూ...

విరిగిన జీవన చక్రం..

విరిగి మూలన పడ్డ
ఈ జీవన చక్రం
ఈ దేశ వెన్నెముక
విరిగిన గుర్తు...

యంత్ర భూతముల
వెంటపడి
కోల్పోయినది
ఈ కఱ, రాతి పనిముట్లేనా?

పచ్చగా పసుపు రాసి
పేడ కళ్ళపి జల్లి
బియ్యపు ముగ్గుతో
కలకలలాడిన పల్లెలు
నేడు ఉపాధి హామీ
మట్టి తట్టల మోతతో
జరుగు బాటు కాక
వలసబాట పట్టి
రంగు వెలిసిన
నలుపు తెలుపు
చిత్రమైంది...

గుండెలో నెత్తురు
గడ్డ కట్టి
నీవిచ్చే ముష్టి పించను
డబ్బులకు అఱులు చాస్తూ
రూపాయి బియ్యం
కడుపు నింపక
వెన్నునంటిన
పేగులను సాగదీస్తూ
నగరం మురికి బాటలో
కుప్పకూలుతోంది...