శివునికి జోహార్లు

 

విప్లవం
శ్వాశించినవాడా..
ఎలుగెత్తి నినదించినవాడా..
గొంతెత్తి గానం చేసిన వాడా...

అమ్మా నను కన్నందుకు
విప్లవాభివందనాలు
తెలిపిన వాడా...

ఊరూ వాడా
ఏకం కావాలని
కలలు కన్నవాడా...

నిరాయుధుల చేతిలో
ఆయుధమై
విప్ప వనాల గాలిలో
తుపాకీ మందు వాసనగా
మారిన వాడా...

నిత్యం
జ్వలించిన వాడా...
పాటల తూటాలను
మాలగా ధరించిన వాడా...

స్వప్నాలను
నెలవంకలను
ఎరుపెక్కించిన వాడా...

ఉద్యమ నెలబాలుడిలా
అడుగులేసి
నేల నాలుగు చెరగులా
విస్తరించిన వాడా...

తుపాకీ గొట్టాన్నే
వెదురు వేణువుగా
మలచి గాయాలకు
పాటల పూత పూసిన వాడా...

నాడు
ఉల్కలా నేల చేరి
నేడు
అరుణతారలా
నింగికి చేరుకున్నవాడా...

దోసిలిలో
కాసిన్ని మోదుగు పూలు
ఇన్ని విప్పపూలు
ఇన్ని మందారాలు
మరికొన్ని ఎర్ర గులాబీ రేకులుతో పాటు
విల్లంబులతో
నీ ముందు నిలుచున్నా...

జోహార్లు
జోహార్లు
అమరుడా
జోహార్లు... 

(కా.శివసాగర్ ఫోటో  తీసినది ప్రఖ్యాత ఫోటోగ్రాఫర్ భరత్ భూషణ్  గారు...)